ذكريات احزان

على ذكرى المواجع والسفر والحال والترحال
طويت اخر ورق عندي بقا من دفتر احزاني
طويته وانكسر قلبي وصوتي بالمواجع سال
ودريت ان الظلام اللي تحت كف السهر جاني
جلست اجمع مسافاتي واغني للسفر موال
على صفحة من الماضي بها حلمي وعنواني
بها كم سافرت عيني ليالي والظلام اهوال
ولها كم سافرت روحي وانا باليل وحداني
حبيبي ليلة البارح مشيت من الغرام اميال
وراك .. وفلت الذكرى شعرها لين غطاني
جلست امشط ظفايرها على كتف الظلام وطال
تخيل من شعرها كل خصلة لي وطن ثاني
حبيبي كل ما اشوفك تجي بالذاكرة تختال
نهر من كوثر الذكرى يجي من فايض اشجاني
تخيل يوم عانقني خيالك خاطري وش قال ؟
تخيل قبل اسولف لك نشدني عنك وجداني
نشدني لين خلاني مدينة هزها زلزال
تخيل ما هدى حتى .!! لقاك بوسط شرياني
اروح لسدرة الموعد معاي لجيدها سلسال
واخاف انك تجي قبلي وترحل قبل تلقاني
هنا كانت ليالينا .. غلا والمقابلات آمال
وهنا كانت مواعيدك .. مطر تخضر به اغصاني
هنا كانت نواظرنا سوالف في كلام اطفال
وهنا كانت عصافيرك على دربي تحراني
وهنا شف باقي آثارك على رمل الوعد مازال
وهنا شف دمعة طاحت من عيونك على شاني
حبيبي لا تنشدني عن اوضاعي وكيف الحال
انا بعدك سحاب ابيض اضم الريح بأحضاني
غلاك بدلة الذكرى بهار وهاجسي فنجال
تقهواه الجروح اللي بها ذكراك تنعاني
تسافر بي واحسب اني وصلت آخر وطن بالبال
واثري اني ما وصلت إلا بداية درب حرماني
وتبقى سيرة الذكرى قصيدة تكتب الترحال
سوالف للعيون اللي صداها .. دمعة لساني
المظلوم؟؟؟